Það hafa örugglega allir lent í því einhvern tímann að það er kominn kvöldmatartími, en enginn hafði tíma til að fara í búðina þann daginn og krakkarnir vilja borða núna! Ekki eftir klukkutíma þegar búið er að versla og elda…núna.
Þetta gerist alveg nokkuð oft heima hjá mér…..en þá er bara að nota hugmyndaflugið og elda eitthvað úr því sem til er í ísskápnum. Þessi pastaréttur varð til svona, allskonar afgöngum skellt saman, en útkoman var mjög góð í þetta sinn!
Uppskriftin:
- 1 pakki tagliatelle pasta
- 1/2 dós beikonsmurostur
- 1/2 dós hvítlauksrjómaostur
- lítill rjómi
- nokkrar sneiðar af skinku, niðurskornar
- 1/2 poki af spínati
- salt og pipar
- rifinn parmesan ostur
Sjóðið pastað. Setjið á pönnu smurostinn, rjómaostinn og rjómann og bræðið saman á miðlungshita. Setjið skinkuna og spínatið útí og leyfið að malla saman þar til spínatið er orðið mjúkt. Kryddið með salti og pipar og smakkið til.
Setjið svo pasta á disk, hellið sósunni yfir og rífið parmesan ost. Tilbúið á nokkrum mínútum!
Njótið vel
BJARGEY & CO. 