Ég held að við könnumst öll við það að hafa lítinn tíma á morgnanna þegar það þarf að koma öllum út í skóla og vinnu á réttum tíma.
Mér finnst æðislegt að fá mér þennan einfalda morgunverð, gríska jógúrt með heimagerðu múslí og eplum þegar ég hef ekki mikinn tíma.
Ég græja yfirleitt múslí fyrir vikuna á sunnudögum og geymi í glerkrukku á eldhúsborðinu. Þetta múslí er æðislegt út á jógúrt eða Ab-mjólk, grauta eða bara eitt og sér ef manni langar í eitthvað gott nasl milli mála.
Uppskrift
- 3 dl möndlur
- 2dl kasjúhnetur
- 1/2 dl pistasíukjarnar
- 1/2 dl graskersfræ
- 1dl tröllahafrar
- 1/2 sólkjarnafræ
- 1/2 dl trönuber
- 2 msk kókosolía
- 2 msk akasíuhunang
Aðferð
- Hakkið möndlur og kasjúhnetur í matvinnsluvél eða með töfrasprota – ég set þær bara örstutt í matvinnsluvél því ég vil hafa þær í stórum bitum.
- Blandið öllum hnetum og fræjum saman í skál og leikið ykkur að vild með tegundir – þú þarft ekki að eiga allt sem ég tel upp hér að ofan og þú getur sett það sem þér dettur í hug með!
- Hrærið kókosolíu og hunangi saman við, bræðið olíuna ef hún er ekki fljótandi.
- Setjið á bökunarplötu með bökunarpappír undir og ristið í ofni við 130-145 gráður á blæstri þar til múslíið hefur brúnast örlítið. Passið að velta blöndunni 2-3 sinnum á meðan svo það brenni ekki.
Síðan er snilld að setja þetta í glerkrukku með loki og taka með í nesti. Bragðbætið að vild með berjum eða öðrum ávöxtum.
Einfalt, hollt og ótrúlega gott.
BJARGEY & CO. 