Sumarið heima

Sumarið er tíminn – að minnsta kosti minn allra uppáhalds tími. Allt í einu er júní hálfnaður! Eins hægt og veturinn líður í mínum huga þá fer sumarið alltaf áfram á ljóshraða!

Ég var búin að sjá það fyrir mér að flatmaga hérna í sólinni í allt sumar en svo er ég búin að vera á ferð og flugi um landið síðan í maí og mikið að gera hjá okkur fjölskyldunni svo það hefur hreinlega ekki gefist mikill tími til þess að slaka á í sólbaði.

Sama hversu annasamir dagarnir eru þá reyni ég að taka mér alltaf tíma frá daglegu amstri til þess að fara aðeins í heita pottinn, þó það sé ekki nema seint á kvöldin áður en ég leggst á koddann. Það er algjörlega endurnærandi eftir langan dag.

Þetta er mín heilsulind. Ég nota tímann á meðan ég ligg í pottinum til að hugleiða, setja á mig maska og djúpnæringu í hárið. Það er bara ekkert betra en að liggja úti í pottinum, hlusta á fuglana syngja og anda að sér ferska íslenska sumarloftinu.

Ég hef aðeins verið að raða á pallinn og skreyta síðan ég sýndi ykkur myndir af honum í vor, en þetta er bara það skemmtilegasta sem ég geri! Ég elska falleg teppi og púða til að nota úti á palli, gerir allt svo heimilislegt og hlýlegt. Ég tek svo teppin og púðana bara inn á kvöldin eða ef það er rigning úti.

Ég ákvað líka í vor að fá mér stóra sólhlíf sem er algjör snilld, en hana er hægt að stilla á nokkra vegu og nota til þess að búa til skugga til dæmis við borðið þegar við erum að borða úti.

Spori elskar pallinn næstum jafn mikið og athyglina….

Nú fá sumarblómin loksins að vera úti og njóta sín vel, en ég er líka með kál og kryddjurtir í pottum. Þessa skemmtilegu grind sem ég hengdi á skjólvegginn fékk ég í Garðheimum og svarta standinn sem ég geymi plöntur og kryddjurtir í keypti ég í Rúmfatalagernum.

Ég elska líka að hafa falleg afskorin blóm í vasa úti á palli eins og þessa dásamlegu túlípana sem nutu sín vel úti um daginn þegar við buðum heim í veislu.

Grillið notum við allt árið um kring en mikið finnst mér gaman að geta skreytt aðeins með blómum í kringum það á sumrin og staðið úti á stuttbuxum að grilla í stað þess að vera dúðuð í úlpu!

Ég elska þessi fallegu sumarblóm og ætla svo sannarlega að njóta þeirra á meðan hægt er. Síðan er það stór draumur hjá mér að fá mér upphitað gróðurhús seinna í garðinn þar sem ég get ræktað meira og haft falleg blóm.

Púðarnir, teppin og handklæðin eru úr H&M home og þessar sætu bastkörfur sem ég nota bæði undir plöntur og teppi.

Hjólaborðið sem ég fékk mér í vor í Rúmfatalagernum hefur verið mikið notað, en ég elska að skreyta það með blómum og svo nota ég það til þess að bera fram drykki líka. Það var því alveg tilvalið að kalla borðið Blómabar Bjargeyjar…

Fallegu sumarblómin sem gleðja mig svo óendanlega mikið!

Það vildi svo skemmtilega til að við vorum að fara losa okkur við gamla dýnu sem ég ákvað á síðustu stundu að nota úti á palli í sumar. Ég keypti bara nýtt lak á hana og gerði kósý með púðum sem ég átti til.

Ég keypti svo byggingarplast í BYKO sem ég breiði yfir dýnuna á nóttunni og ef það rignir og þá er alveg minnsta málið að hafa hana úti á pallinum.