Siesta Key Beach

Skemmtilegar stendur er eitthvað sem ég fell alltaf fyrir en Siesta Key Beach er ein sú allra fallegasta sem ég hef heimsótt.

Við fjölskyldan ákváðum að heimsækja Sarasota og Siesta Key Beach á ferðalagi okkar í Flórída í vetur og gistum á hóteli við stöndina.

Tropical Breeze Resort er íbúðahótel alveg við ströndina svo það var gott að geta bara rölt niður á strönd frá íbúðinni okkar, en við vorum í stórri íbúð með tveimur svefnherbergjum, stofu, eldhúsi og baði.

Í garðinum við hótelið var upphituð sundlaug sem kom sér vel þar sem við vorum á ferðinni í febrúar og ekkert sérstaklega gott að stinga sér í ískalda sundlaug á þeim árstíma, en hitinn var samt sem áður um 24 gráður svo okkur fannst bara mjög ljúft að leika okkur í lauginni og sóla okkur við sundlaugarbakkann.

Alltaf stuð í sundlauginni!

Systkinin skemmtu sér svo vel í sundlauginni að ég þurfti bókstaflega að veiða þau uppúr um kvöldið þegar sólin var löngu farin!

Ég slakaði hins vegar aðallega á við sundlaugarbakkann þó ég hafi alveg skellt mér nokkrum sinnum í laugina og tekið nokkra boltaleiki með krökkunum.

Það er rólegt og notalegt andrúmsloft á Siesta Key og hótelið okkar var við Ocean Boulevard sem er skemmtileg gata sem iðaði af mannlífi með úrvali af veitingastöðum, litlum verslunum og kaffihúsum.

Við fórum út að borða eitt kvöldið á skemmtilegan veitingastað sem heitir The Hub Baja Grill þar sem við sátum úti og nutum þess að fylgjast með mannlífinu og borða góðan mat saman.

Þeir eru frægir fyrir fisk og rækju Tacos svo við urðum auðvitað að prófa það!

Og á alvöru strandstöðum eru að sjálfsögðu góðir kokteilar sem ég lét ekki fram hjá mér fara! Frozen Strawberry Daquiri er það besta eftir dag í sólinni…

Bestu mín að njóta lífsins í fríinu.

Mjög flottur staður og mikið lagt í að skapa réttu stemninguna.

Það var yndislegt að geta farið á ströndina í smá boltaleik enda dásamlega falleg strönd.

Þessir kofar fyrir strandverðina eru það krúttlegasta.

Ströndin hefur fengið mörg verðlaun og er að sjálfsögðu dásömuð fyrir einstaka fegurð, en það er líka mjög góð aðstaða fyrir gesti sem er ekki allsstaðar.

Æðisleg strönd sem við munum klárlega heimsækja aftur!

Ég er komin þangað aftur í huganum við það að skoða þessar myndir! Og ekki veitir af smá upplyftingu á þessum tímum sem við erum að ganga í gegnum núna.