South Beach Miami!

Við fjölskyldan eyddum síðustu dögum ársins á ströndinni í Miami innan um iðandi mannlíf og pálmatré. Árið 2018 var ferðaárið mikla hjá okkur og því virkilega skemmtilegt eyða síðustu dögum þess á þessum geggjaða stað.

Við keyrðum frá Orlando til Miami þar sem við eyddum jólunum með stórfjölskyldunni, en það tók um fjóra klukkutíma að keyra sem að mínu mati er frekar langt ferðalag með krakkana í bíl en það var vel þess virði því Miami er ótrúlega skemmtilegur staður að heimsækja.

Að koma til Miami frá Orlando er eins svolítið eins og að fara af elliheimili yfir í útskrifarpartý úr menntaskóla…það er allt frekar rólegt í Orlando en eins og vera í miðjum sirkus að ganga um götur Miami. Fyrsta kvöldið okkar var mjög skrautlegt þar sem við hittum fullt af fólki með páfagauka eða apa á öxlinni, dragdrottningar, fólk í allskonar búningum, heilu klappstýruliðin og fótboltakappa auk ferðamanna og innfæddra að skemmta sér á götum úti og á ströndinni.

Ljúfa lífið innan um öll pálmatrén…

Einn ískaldur í 30 stiga hita…það tilheyrir að smakka nýjan ís á nýjum stöðum.

Það vantaði ekkert upp á úrvalið….

Við vorum í tvo daga í Miami og eyddum langmestum tíma á ströndinni, en hún var risastór og algjörlega æðisleg.

Við bókuðum okkur hótel á South Beach þannig að við vorum um 5 mínútur að ganga niður að strönd frá hótelinu sem var virkilega þæginlegt.

Krökkunum fannst æði að leika á ströndinni og í sjónum, það var dásamlegt að fylgjast með þeim njóta sín í jólafríinu en ef við hefðum verið heima á Íslandi hefðu þau líklega verið úti í úlpu og snjóbuxum!

Öldurnar voru vinsælastar….

Ég fékk að njóta mín í botn á South Beach, en mér líður alltaf best á ströndinni með sólina og ölduniðinn í bakgrunni. Það var bara hreint út sagt dásamlegt að eyða síðustu dögum ársins í þessari paradís.

Gaman að sjá og ganga um hina frægu götu Ocean Drive….

Skemmtilegt og litríkt umhverfi.

Við vorum staðsett í hinu fræga Art Deco hverfi á South Beach Miami, en þar eru fallegar byggingar og iðandi mannlíf. Við borðuðum á veitingastöðum við ströndina og fengum okkur svalandi drykki.

Ég fæ mér alltaf Mojito í hitanum…ferskt og gott.

Og hér var gott að slaka á…..

í hótelgarðinum okkar, sem var mjög flottur og skemmtilegur.

Hérna er sonurinn fyrir utan veitingastaðinn Naked Taco sem hefur fengið mörg verðlaun fyrir sjúklega gott Taco! Það var mjög gott.

Annars forum við bara að njóta lífsins í sólinni og samverunnar…

Það voru dýrmætar minningar skapaðar í þessarri ferð eins og í öllum okkar ferðalögum.

Allir að læra eitthvað nýtt og upplifa, njóta og leika sér. Ég finn hvað það gerir öllum í fjölskyldunni gott að taka sér frí frá vinnu, skóla og hversdagslífinu og fara saman í ferðalag.

Ég er svo þakklát fyrir þetta ferðalag, fjölskylduna mína og tímann okkar saman. Dýrmætasta gjöfin í þessu lífi er að geta eytt tíma með þeim sem maður elskar og að ferðast saman er ómetanlegt.

Að lokum vil ég þakka ykkur lesendum mínum samfylgdina á árinu 2018!

Ég tek fagnandi á móti nýju ári 2019 og hlakka til þess að deila með ykkur nýjum ævintýrum, hversdagslífinu og mínum hugleiðingum. Það verða mörg spennandi verkefni hjá mér á nýju ári og ég mun leyfa ykkur að fylgjast með. En fyrst mun ég segja ykkur betur frá ævintýrum okkar hérna í Flórída eins og sundi með höfrungum og ferðum í ótrúlega skemmtigarða.