Það má með sanni segja að síðastliðið ár hafi verið ferðaárið mikla hjá mér og fjölskyldunni en ég hef verið á miklu flakki í allskonar skemmtilegum ferðalögum.
Þetta byrjaði allt með hjónaferð og fríi til Barcelona og Sitges, næst fermingarferð með dótturinni til Boston, ég fór svo ein í jógaferð til Tossa de Mar á Spáni, þar á eftir með fjölskylduna í frí til Tenerife, fór sem fararstjóri hjá Gaman Ferðum með 25 konur í Lúxus SPA ferð til Litháen og síðan með annan hóp af frábærum konum í Dekur og draumaferð til Tenerife.
Ef þú vilt skoða fleiri myndir úr einhverri ferð – smellir þú á nafn áfangastaðarins í upphafi og ferð þaðan inn á ítarlegri bloggfærslu um hverja ferð fyrir sig.
Barcelona og Sitges
Vil hjónin fórum í þessa dásamlegu vikuferð fyrir ári síðan þar sem við nutum lífsins saman í sólinni og skoðuðum saman ævintýraborgina Barcelona.
Ég er að segja ykkur það að ein hjónaferð á ári er nauðsynleg! Njóta þess að vera tvö saman og fá smá frí frá hversdagsleikanum, vinnu, uppeldi og heimilisstörfum.
Ég mæli svo innilega með Barcelona ef þú vilt fá allt í einni ferð – sól, strönd, menningu, fallegar byggingar, listaverk og sögu.
BOSTON
Við mæðgurnar skelltum okkur til Boston í apríl en ferðin var fermingargjöf til Bryndísar frá okkur foreldrunum. Við tókum ákvörðun fyrir nokkrum árum að gefa börnunum okkar ferðalag í fermingargjöf því minningar um skemmtilega ferð eru svo dýrmætar.
Stelpuferð til Boston er bara skemmtileg! Við mæðgur fórum í búðir, skoðuðum söfn, röltum um borgina, fórum á góða veitingastaði og létum tríta okkur eins og prinsessur á hótelinu, pöntuðum okkur morgunmat í rúmið og eyddum góðum tíma í að setja á okkur maska og önnur lífsnauðsynleg krem!
Boston er ein af mínum allra uppáhalds borgum.
Í Boston er skylda að skella sér á einn alvöru hamborgara á Shake Shack og renna honum niður með ísköldum súkkulaði sjeik….eða jarðaberja!
Við fórum líka nokkrar ferðir á The Cheesecake Factory…..þar er bara svo góður matur og margar ostakökur sem ekki má missa af…..
Tossa de Mar
Ein besta ferð sem sem ég hef gefið sjálfri mér er jógaferðin sem ég fór í til Tossa de Mar í maí með Gaman Ferðum. Ég hafði lengi stefnt að því að fara í ferð þar sem ég gæti tekið mér gott frí og ræktað sál og líkama í fallegu umhverfi.
Tossa de Mar er einn fallegasti smábær sem ég hef komið til um ævina. Það er eins og að ganga um í ævintýri að vera í Tossa de Mar…
Ég mæli innilega með ferð þangað hvort sem þig langar að fara í frí, skoðunarferð, afslöppun, jógaferð eða gönguferð.
Það er líka mjög stutt að fara til fallegu borgarinnar Girona en ég fór þangað í skoðunarferð og féll algjörlega fyrir borginni sem er eins og eitt stórt listaverk.
Næst var ferðinni haldið í fjölskyldufrí til…
Tenerife
Draumafrí okkar fjölskyldunnar var að fara saman til Tenerife, gista á Green Garden Resort, skemmta okkur saman í sundlaugagarði, slaka á í sólinni, fara í dýragarð og vatnsrennibrautagarð og eiga góðar samverustundir.
Tenerife stóð svo sannarlega undir þessum væntingum og gott betur en það enda algjör fjölskylduparadís. Okkur hjónunum fannst það mesta fríið að vera með allt innifalið á hótelinu okkar Green Garden Resort, en þá þurftum við aldrei að versla inn, græja mat eða ganga frá…við bara skelltum okkur í mat þegar við vorum svöng og svo var farið aftur á sólbekkinn! Krakkarnir gátu svo sótt sér drykki og ís þegar þeim hentaði.
Krökkunum fannst skemmtilegast að fara í Monkey Park, en þar er hægt að gefa dýrunum að borða og halda á þeim.
Síðan var farið í um 120 ferðir í rennibrautunum í Siam Park og það dugði ekkert minna til en að skella sér tvisvar í garðinn á þessum tveimur vikum sem við vorum í ferðinni. Þessi rennibrautagarður er frábær fyrir alla fjölskylduna.
Draumafríið í alla staði og við munum klárlega fara aftur til Tenerife þegar við þurfum á endurnærandi fjölskyldufríi að halda.
Ég fór svo í mina fyrstu ferð sem fararstjóri hjá Gaman Ferðum með 25 konur í
Lúxus SPA ferð til Litháen
Þessi ferð var endurnærandi fyrir líkama og sál, en við vorum í heila viku á lúxus SPA hóteli í Vilnius þar sem hægt var að fara í nudd og snyrtimeðferðir á hverjum degi, slaka á í heita pottinum og gufunni, fara í gönguferðir í dásamlega fallegu umhverfi og njóta þess að fylla líkamann af góðri orku og láta dekra við sig.
Ég er mjög mikill aðdáandi þess að slaka á í fallegri heilsulind og þetta SPA er eitt það flottasta sem ég hef á ævi minni séð.
Þetta SPA var ekki bara glæsilegt, það var líka allt svo faglegt og fágað hvort sem maður fór í endurnærandi nudd eða dásamlegar snyrtimeðferðir.
Það var endalaust úrval af nuddmeðferðum og það besta sem ég hef gert fyrir sjálfa mig í langan tíma var að fara daglega í mismunandi nudd. Ég meina hvernig er hægt að velja þegar það er allt í boði…
Indverskt Ayurveda nudd, aroma ilmolíunudd, klassískt nudd, tælenskt nudd, sænskt nudd, nudd í vatni, fótanudd, nudd fyrir höfuð og herðar….bara nefndu það!
Ég fór svo tveimur vikum seinna með annan dásamlegan hóp kvenna í
Dekur og draumaferð til Tenerife
Í þessari dásamlegu ferð var ég með námskeiðið mitt Besta útgáfan af sjálfri þér, við hugleiddum saman á ströndinni, gerðum vel við okkur í mat og drykk og nutum alls hins besta sem Tenerife hefur uppá að bjóða.
Það er alveg ótrúlega gaman að fara með svona frábæran hóp af konum í svona endurnærandi frí, það var mikið hlegið, grátið og allt þar á milli! Þvílík forréttindi að fá að leiða hópinn sem fararstjóri og alveg yndislegt að sjá nýja vináttu verða til og skapa saman ógleymanlegar minningar.
Ég er svo þakklát fyrir að hafa fengið þetta tækifæri að vera fararstjóri og halda námskeiðið mitt fyrir svona frábærar konur í tveimur æðislegum ferðum í haust.
Fyrir mig að sjá hugmynd verða að veruleika er ólýsanleg tilfinning og ég er eiginlega ekki ennþá búin að átta mig á því að þetta hafi raunverulega gerst. Ferðirnar og námskeiðin eru afrakstur mikillar vinnu en þá allra skemmtilegustu sem ég hef nokkurntímann unnið!
Þetta ár er búið að vera draumi líkast. Ég segi það oft að líf mitt sé lifandi sönnun þess að draumar rætast ef maður trúir á þá og ég stend við stóru orðin.
Ef þú getur hugsað það – þá getur þú það!
Ég mun halda áfram að lifa drauminn og ferðast um heiminn á nýju ferðaári sem er í þann mund að hefjast, en eftir nokkrar vikur erum við fjölskyldan farin á vit ævintýranna í Orlando Flórída.
BJARGEY & CO. 