Í nóvember fórum ég og Hrafnhildur í mæðgnaferð til Glasgow. Ferðin var jólagjöfin okkar til Hrafnhildar en fyrr á árinu buðum við Bryndísi út á leikinn Ísland – Frakkland í París (Ferðasagan er hér) og það var hennar jólagjöf. Kannski svolítið langur tími frá ferð að jólum en okkur fannst það bara vera góð hugmynd að gera eitthvað fyrir hana sem myndi slá í gegn og það var langþráður draumur hjá henni að sjá íslenska landsliðið spila stórleik enda mikil áhugamanneskja um fótbolta (sjá meira um það hér). En þegar við tókum ákvörðun um að fara á leikinn sl. sumar sem var mikil skyndiákvörðun þá vissum við að Hrafnhildur myndi ekki njóta ferðarinnar eins og stóra systir því hún hefur engan áhuga á fótbolta og vill alls ekki vera þar sem eru mikil læti eða mannþröng. Svo það var ákveðið á núlleinni líka að ég myndi bjóða henni með mér til Glasgow um haustið í staðinn.
Ferðin var frábær í alla staði og við áttum yndislegan tíma saman. Það var langþráður draumur hjá dömunni að fara í Build a Bear og gera sinn eigin bangsa svo við vorum varla lentar í Glasgow áður en við fórum í bangsabúðina frægu.
Bróðir minn og mágk0na búa í Glasgow svo það var yndislegt fyrir okkur að hitta þau og eyða með þeim skemmtilegum tíma.
Við fórum auðvitað saman út að borða og eyddum dágóðum tíma saman í búðarápi.
Við mæðgur skelltum okkur líka á eitt skemmtilegasta safn sem ég hef farið á, en það heitir Kelvingrove Art Museum og hefur að geyma ýmsar gersemar. Hérna koma nokkrar myndir frá því:
Það var líka mikið ævintýri fyrir 9 ára stúlku að kíkja í Hamleys enda alltaf svo flott dót þar!
Það læddist nú eitt og annað í innkaupakörfurnar í ferðinni, en við versluðum allar jólagjafirnar, ég fataði krakkana upp eins og ég geri árlega þegar ég fer til Glasgow (margborgar sig fyrir þriggja barna mæður að minnsta kosti) og svo verslaði ég aðeins fyrir mömmu og tengdamömmu líka þannig að staðan var svona eftir ferðina:
Fimm ferðatöskur, poki og kassi….það var ekkert sérstaklega gaman að burðast með þetta heim en það hafðist!
Við mæðgur fórum á stefnumót einn daginn á æðislegan pizzastað eða ítalskan veitingastað sem heitir Ask Italian og hann var alveg geggjaður. Það er alltaf gaman að fara út að borða með krökkunum, en þegar maður á þrjú börn og allir vilja tala á sama tíma nær maður kannski ekki eins mikið að njóta þess eins og þegar við förum á svona one on one deit svo ég leyfi mér að sletta aðeins! Það er sérstök stund að geta gefið einu barni í einu óskiptan tíma og athygli og stundum má maður njóta sín einn án systkina sinna þó þau séu alveg frábær líka.
Meiriháttar góðar pizzur!
Við skemmtum okkur líka bara vel í kósyheitum á hótelinu og hérna er Hrafnhildur að máta kósýgallann sem hún keypti sér í Primark (og hefur varla farið úr síðan…haha)
Yndisleg ferð og dásamlegar minningar. Og Hrafnhildur var í skýjunum með jólagjöfina, það er nú fátt skemmtilegra í þessu lífi en að sjá börnin sín njóta lífsins, skoða eitthvað nýtt og skemmta sér vel svo þetta var líka stór gjöf fyrir mig.
Takk fyrir að lesa,
BJARGEY & CO. 