Þetta herbergi gerði ég fyrir stelpuna mína þegar hún var 7 ára. Ég vildi hafa það rómantískt og smá gamaldags, en ég elska að blanda saman gömlu og nýju. Ég var mjög ánægð með útkomuna og hún líka.
Liturinn á herberginu er eins og margar uppskriftir sem ég geri, eitthvað sem ég blandaði sjálf. En ég átti sem sagt dós af þessum hérna lit frá Slippfélaginu sem ég hafði notað á skáp sem ég gerði upp en átti mikinn afgang. Ég blandaði honum saman við hvíta innanhúss málningu og fékk þennan ljósa fallega lit.
Ég man því miður ekki númerið á litnum, en hann er á litaspjaldi hjá þeim í Slippfélaginu.
Hérna sést hann betur þegar hann er kominn á vegginn.
Ég valdi að skreyta með persónulegum munum, hérna er mynd af henni frá því hún var lítil og einn af fyrstu böngsunum hennar. Setti líka fyrstu spariskóna hennar út í glugga, það er fátt krúttlegra er litlir skór.
Mig langaði að hafa eitthvað skraut á þessum stóra vegg, en ég málaði þetta tré sjálf beint á vegginn. Setti svo fiðrildin á eftirá, en þau eru límmiðar úr Söstrene Grene.
Litla kommóðan er úr Góða hirðinum en ég lakkaði hana hvíta. Bambi er úr Hrím. Ég er mjög hrifin af því að nota svona sætar vegghillur, en þær gera svo mikið fyrir heildarmyndina, ég fékk þessar í Ikea. Það er líka skemmtilegt að hafa bókahillur nálægt rúminu, alltaf hægt að skipta um bækur og velja einhverja skemmtilega fyrir svefninn.
Takk fyrir að lesa!
Bjargey
BJARGEY & CO. 