Ég ætla að deila með ykkur uppskrift að mínum allra uppáhalds rétti.
Ég elska humar! Það er ekkert flóknara en það. En það er líka gaman að eiga svona allra uppáhalds mat því þá er hann spari og ég geri þennan rétt bara á jólunum og við mjög hátíðleg tilefni.
Humar í hvítvíns og eplasósu
Uppskrift:
- 1 kg stór humar
- klettasalat
- 3 hvítlauksgeirar
- íslenskt smjör
Sósan:
- 3 epli
- 1 dl. hvítvín
- 2 dl. rjómi
- 1 1/2 tsk. dijon sinnep
- 2 msk fljótandi humarkraftur
- salt og pipar eftir smekk
Keypti þennan flotta humar hjá Fiskikónginum á Sogavegi, en ég fer alltaf þangað til að kaupa humar. Gott úrval hjá þeim og góður humar. Svo er ég bara þannig að ef ég fæ góða þjónustu einhverstaðar þá kem ég aftur og aftur!
En hefjumst handa og fyrst er að byrja á sósunni. Ég nota stóra pönnu og byrja á því að setja eplin í bitum á miðlungs hita með klípu af íslensku smjöri. Set svo hvítvínið útá og leyfi þessu að malla þar til eplin hafa brúnast aðeins og eru orðin frekar mjúk.
Þá bæti ég rjómanum, dijon sinnepi og humarkraftinum saman við og leyfi sósunni að krauma þar til hún verður þykk og djúsí:
Því næst er að hella sósunni í skál og mauka hana með töfrasprota þannig að hún verði silkimjúk. Geyma hana svo í skálinni og setja vel af íslensku smjöri og 3 smátt skorna hvítlauksgeira útá pönnuna og hækka hitann. Takið humarinn úr skelinni og setjið á vel heita pönnuna. Steikið í stutta stund þar til hann er fulleldaður.
Næst er að setja sósuna aftur út á pönnuna og smakka til, getið sett salt og pipar eða bætt við rjóma ef þarf, allt eftir ykkar smekk.
Og þá er ekkert annað eftir en að njóta. Ég get lofað ykkur því að þið verðið ekki svikin af þessum rétti, hann er himneskur þó ég segi sjálf frá!
BJARGEY & CO. 